11 ABRIL: CONFERENCIA DE ZOOLOXÍA PORNO con PINGÜINO e MONSTRUO no C.C. El Pueblo

Recentes investigacións de científicos españois que viven no estranxeiro acaban de revelar datos sorprendentes sobre o tamaño de certos animais. Por un trastorno da percepción froito do antropocentrismo occidental, bestas que creíamos de pequeño tamaño, manexable e facilmente controlables resultaron ser en realidade enormes e perigosas. De todas formas, este trastorno fixo posible a evolución do ser humano, que se enfrontou cunha valentía inusitada a seres dos que hoxe sabemos que teñen un tamaño entre os 2 e os 4 metros de diámetro: porcos celtas, gatos riquiños, motorratos de Marte... Dende a sección de I+D de PORNO queremos compartir este coñecemento con Ourense pero, ó mesmo tempo, celebrar desenfrenadamente o feito de que a egolatría humana nos trouxera a onde estamos hoxe. Por iso, ESTE VENRES 11 DE ABRIL, traemos un exemplar domesticado de PINGÜINO, que será visible vixiado de cerca polos nosos membros favoritos do Partido Animalista: MONSTRUO. Todo iso na recén inaugurada Meca cultural de Ourense: O CAFÉ CULTURAL EL PUEBLO. Polo módico prezo de 3 EUROS CON CONSUMICIÓN INCLUÍDA.

PINGÜINO miden máis ou menos como Robert Smith e desenvolveron unhas habilidades sorprendentes para ser aves, facendo unha música que ten algún parecido ó canto dos paxaros. Pero claro, son paxaros de metro oitenta e sempre foi sorprendente esa habilidade dalgúns para poñerse nas torres de alta tensión sen que lles pase nada. A estes pasoulles que se electrificaron e entón acabaron sacando un LP que se chama “Gente Formal” no que cantan sobre as costumes humanas e hispanas que máis os sorprenden. Gústanlles Sonic Youth, Hüsker Dü ou Dinosaur Jr. Por se fora pouco, son asturianos.

http://pinguino.bandcamp.com/

A MONSTRUO tamén lles gustan eses grupos, pero sobre todo gústalles a Nai Terra. Despois da súa fase militante e de que algúns deles cumpriran pequenas penas de cárcere por encadearse a petroleiros en augas internacionais, apostan por un lado espiritual que sorprende alá por onde pasa. Supresión do ego e comunión coa natureza a través de electricidade. A suma do poder das súas raíces africanas e a tecnoloxía que desenvolvían os técnicos de televisión rurais que aprendían por correspondencia. En todo caso, non deixa de ser glam rock.

http://discosporno.bandcamp.com/album/monstruo-3

21:00h: ábrense as portas (eufemismo para que vaias vindo e observes ós animais no seu hábitat natural: a barra de bar)

21:30 con puntualidade británica: empeza a exhibición.